ယာမယ်လ်ကို မက်ဆီနဲ့နှိုင်းယှဉ်ခြင်းက ရူးကြောင်ကြောင်နိုင်တယ်လို့ ဆိုလိုက်တဲ့ အိုလ်မို
ဘာစီလိုနာကွင်းလယ်လူ ဒန်နီအိုလ်မိုက အသင်းရဲ့လူငယ်ကြယ်ပွင့်ကစားသမား လာမိုင်းယာမယ်လ်ကို လီယွန်နယ်မက်ဆီလို ဘောလုံးလောကဂန္ထဝင်နဲ့ နှိုင်းယှဉ်နေခြင်းက ရူးကြောင်ကြောင်နိုင်လွန်းတယ်လို့ ပြောကြားလိုက်ပါတယ်။
ဘာစီလိုနာရဲ့ သမိုင်းတစ်လျှောက်ဂိုးသွင်းအများဆုံးကစားသမား မက်ဆီလိုပဲ ယာမယ်လ်ဟာ ကလပ်ရဲ့လူငယ်အကယ်ဒမီ လာမာစီယာမှ ထွက်ပေါ်လာခဲ့သူဖြစ်ပြီး မကြာခဏဆိုသလို အာဂျင်တီးနားဂန္ထဝင်နဲ့ နှိုင်းယှဉ်ခံနေရတာဖြစ်ပါတယ်။ သို့သော် ယာမယ်လ်ကိုယ်တိုင်ကလည်း သူ့ကိုမက်ဆီနဲ့နှိုင်းယှဉ်ဖို့မဖြစ်နိုင်သေးကြောင်း ပြောကြားထားခဲ့တာဖြစ်ပါတယ်။
အသက်-၁၈ နှစ်အရွယ်ကစားသမားဟာ ပြီးခဲ့တဲ့တနင်္ဂနွေနေ့က ရီးရဲလ်အိုဗီဒိုကို ၃-၀ နဲ့ဂိုးပြတ်အနိုင်ရခဲ့တဲ့ပွဲစဉ်မှာ အသင်းအတွက် အံ့မခန်းသွင်းဂိုးတစ်ဂိုးကို နောက်ပြန်ကန်ချက်နဲ့ သွင်းယူပေးနိုင်ခဲ့ပါတယ်။ ယခုအခါမှာ အိုလ်မိုက “ယာမယ်လ်မှာ သူလျှောက်ရမဲ့လမ်းကြောင်းရှိနေတယ်ဆိုတာ သူကိုယ်တိုင်သိပါတယ်။ အခုကစားနေတဲ့ ဘယ်ကစားသမားကိုမဆို မက်ဆီနဲ့နှိုင်းယှဉ်တာကတော့ အတော်လေးရူးကြောင်ကြောင်နိုင်ပါတယ်”
“ယာမယ်လ်က အံ့မခန်းကစားသမားပါ။ အသက်အရမ်းငယ်ပါသေးတယ်။ အခုသူပေးဆပ်နေတဲ့အရာတွေက မယုံနိုင်စရာကောင်းသလို အနာဂတ်မှာလည်း ဒီထက်မက အသင်းအတွက်ပေးဆပ်နိုင်မယ်လို့ထင်ပါတယ်” လို့ပြောကြားခဲ့ပါတယ်။
ယာမယ်လ်ဟာ အသက်-၁၅ နှစ်အရွယ်မှာတင် ဘာစီလိုနာအသင်းကြီးအတွက် စတင်ပွဲထွက်ကစားခဲ့သူဖြစ်ပြီး လာလီဂါရဲ့အသက်အငယ်ဆုံးဂိုးသွင်းရှင်စံချိန်အပါအဝင် ဘောလုံးလောကရဲ့စံချိန်အများအပြားကို ချိုးဖျက်ထားသူဖြစ်ပါတယ်။ ကစားသမားဟာ စပိန်လက်ရွေးစင်အသင်းနဲ့အတူ ၂၀၂၄ ယူရိုချန်ပီယံရှစ်ဖလားကိုကိုင်မြှောက်နိုင်ခဲ့သလို၊ ပြီးခဲ့တဲ့ရာသီကလည်း ဘာစီလိုနာနဲ့အတူပြည်တွင်းဖလားအားလုံးကို သိမ်းပိုက်နိုင်ခဲ့ပါတယ်။
ဆက်လက်ပြီး အိုလ်မိုက “သူက တည်ငြိမ်တဲ့ကစားသမားပါ။ သူ့မှာ သူ့လမ်းကြောင်းနဲ့ ကိုယ်ပိုင်အတွေးအခေါ်ရှိပါတယ်။ ကျွန်တော်တို့ကတော့ သူ့ကို ကူညီပေးနိုင်ဖို့ကြိုးစားရပါမယ်။ ဒါက ကျွန်တော်တို့ရဲ့အလုပ်ပါ” လို့ထပ်လောင်းပြောကြားခဲ့ပါတယ်။
Source : https://www.goal.com
