ဥရောပစင်မြင့်မှာ အရှက်ရခဲ့တဲ့ ပရီးမီးယားလိဂ်အသင်းများနဲ့ မန်စီးတီးရဲ့ ခက်ခဲတဲ့ရှေ့ဆက်ခရီး

ကမ္ဘာ့အကောင်းဆုံးလို့ ကြွေးကြော်ထားတဲ့ ပရီးမီးယားလိဂ်ရဲ့ ဂုဏ်သတင်းဟာ ၂၄ နာရီအတွင်းမှာပဲ အကြီးအကျယ် ထိခိုက်ပျက်စီးသွားခဲ့ပါတယ်။ ရီးရဲလ်မက်ဒရစ်က မန်စီးတီးကို ပြတ်ပြတ်သားသား အနိုင်ယူလိုက်တာဟာ အင်္ဂလန်ကလပ်တွေအတွက် မျက်စိပွင့်သွားစေမဲ့ သင်ခန်းစာတစ်ခု ဖြစ်ခဲ့ပါတယ်။

စပါးအသင်းဟာလည်း အက်သလက်တီကိုမက်ဒရစ်ကို ၅-၂ နဲ့ ရှုံးနိမ့်ခဲ့သလို၊ မန်စီးတီးကလည်း ဒုတိယအကျော့မတိုင်ခင်မှာ ဖက်ဒီရီကို ဗယ်ဗာဒီရဲ့ ဟက်ထရစ်ဂိုးတွေကြောင့် ၃-၀ နဲ့ အရေးနိမ့်နေပြီး နောက်တစ်ဆင့်တက်ဖို့ တောင်တက်ရသလို ခက်ခဲတဲ့အခြေအနေနဲ့ ရင်ဆိုင်နေရပါတယ်။

တခြားအင်္ဂလန်အသင်းတွေကို ကြည့်မယ်ဆိုရင်လည်း ချဲလ်ဆီးက ပီအက်စ်ဂျီကို ၃-၀ နဲ့ ရှုံးခဲ့ပြီး၊ လီဗာပူးက ဂါလာတာစာရေးကို ၁-၀ နဲ့ ရှုံးနိမ့်ခဲ့ပါတယ်။ အာဆင်နယ်နဲ့ နယူးကာဆယ်တို့ကတော့ အသီးသီး သရေကျခဲ့ကြပါတယ်။ ပရီးမီးယားလိဂ်က ခြောက်သင်းလုံးဟာ ရှုံးထွက် ၁၆ သင်းအဆင့် ပထမအကျော့မှာ တစ်သင်းမှ အနိုင်မရခဲ့တာကြောင့် အင်္ဂလန်အသင်းတွေရဲ့ လွှမ်းမိုးမှုဆိုတာကို ပြန်လည်မေးခွန်းထုတ်စရာ ဖြစ်လာပါတယ်။

ဂွါဒီယိုလာကတော့ သူ့အသင်းရဲ့ ခြေစွမ်းဟာ ရလဒ်လောက် ဆိုးဝါးမနေဘူးလို့ ယူဆနေပေမဲ့ အခွင့်အရေး ဖန်တီးနိုင်မှု အားနည်းခဲ့တာကိုတော့ ဝန်ခံခဲ့ပါတယ်။ ဂိုးသမား ဒွန်နာရမ်မာက ပင်နယ်တီ ကာကွယ်ပေးနိုင်ခဲ့လို့သာ ၄-၀ မဖြစ်ဘဲ ၃-၀ နဲ့ သက်သာခဲ့တာပါ။ အခုတော့ အင်္ဂလန်အသင်းတွေထဲမှာ အာဆင်နယ်နဲ့ လီဗာပူးတို့သာ နောက်တစ်ဆင့်တက်ဖို့ မျှော်လင့်ချက်အရှိဆုံး ဖြစ်နေပြီး ကျန်တဲ့အသင်းတွေကတော့ ဒုတိယအကျော့မှာ အစွမ်းကုန် ကြိုးစားရတော့မှာ ဖြစ်ပါတယ်။

Source : https://www.bbc.com/