ရမ်ဘို ဇာတ်လမ်းသစ်မှာ ရင်ဆိုင်ရမဲ့ အခက်ခဲဆုံးစိန်ခေါ်မှုက ဘာဖြစ်မလဲ?

ရမ်ဘို (Rambo) ရဲ့ ဇာတ်လမ်းအစ (Prequel) ကို ပြန်ရိုက်မဲ့သတင်းက တကယ့်ကို စိတ်လှုပ်ရှားစရာပါပဲ။ ဒါပေမဲ့ တစ်ဖက်မှာလည်း ဒီကားကို အောင်မြင်အောင် ပုံဖော်ဖို့က ဇာတ်လမ်းတွဲတစ်ခုလုံးမှာ အခက်ခဲဆုံးလို့ဆိုနိုင်တဲ့ စိန်ခေါ်မှုကြီးတစ်ခု ဖြစ်နေပါတယ်။ အခုဆိုရင် ဂျွန် ရမ်ဘို (John Rambo) လို့ အမည်ပေးထားတဲ့ ဒီဇာတ်ကားက ရိုက်ကူးရေးတွေတောင် စတင်နေပြီလို့ သိရပါတယ်။ ဒါကြောင့် ရမ်ဘိုရဲ့ နောက်ကြောင်းရာဇဝင်တွေကို ပိတ်ကားထက်မှာ မကြာခင် မြင်တွေ့ရတော့မှာပါ။

ဒီဇာတ်လမ်းက ပရိသတ်တွေ ချစ်ကြတဲ့ ဇာတ်ကောင်ရဲ့အတိတ်ကို အသေးစိတ် ပြန်ပြပေးမှာမို့လို့ တကယ့်ကို ထူးခြားတဲ့ အခွင့်အရေးပါပဲ။ ဒါပေမဲ့ အရင်ထွက်ခဲ့တဲ့ Rambo: Last Blood ဇာတ်ကားထက် ဆယ်စုနှစ်ပေါင်းများစွာ နောက်ပြန်သွားရမှာဖြစ်တဲ့အတွက် ဇာတ်လမ်းပိုင်းအရ တချို့ အခက်အခဲတွေ ရှိနေပါတယ်။ ဒါပေမဲ့ အရင်ကားတွေဆီက သင်ခန်းစာကောင်းကောင်း ယူနိုင်ရင်တော့ ဒီစိန်ခေါ်မှုကို Rambo 6 အနေနဲ့ ကျော်ဖြတ်နိုင်မှာပါ။

First Blood ဇာတ်ကားမတိုင်ခင် အချိန်ကို အခြေခံထားတာက စိတ်ဝင်စားဖို့ ကောင်းပေမဲ့ စိန်ခေါ်မှုကတော့ အတော်လေး ကြီးပါတယ်။ ဂျွန် ရမ်ဘို (John Rambo) ဆိုတဲ့ နာမည်နဲ့ ထွက်လာမဲ့ ဒီကားက ရမ်ဘိုရဲ့ ဗီယက်နမ်စစ်ပွဲ အတွေ့အကြုံတွေကို ပြမှာပါ။ ဒါပေမဲ့ ဇာတ်လမ်းသွားကတော့ အချိန်ကာလ အစဉ်အတိုင်းသွားရမှာဖြစ်လို့ အရင်ထွက်ထားတဲ့ ရမ်ဘိုကားတွေနဲ့ တူမှာ မဟုတ်ပါဘူး။

အဓိက စိန်ခေါ်မှုကတော့ ဇာတ်လိုက် ဂျွန် ရမ်ဘိုက ဒီကားထဲမှာ သေလို့ မရဘူးဆိုတာ လူတိုင်း သိနေတာပါပဲ။ နောက်ပိုင်းကားတွေနဲ့ အဆက်အစပ် မိဖို့ဆိုရင် သူက အဆုံးထိ အသက်ရှင်နေရမှာပါ။

ဒီတော့ အက်ရှင်ကားတွေမှာ ပါလေ့ရှိတဲ့ “မင်းသား သေမလား၊ ရှင်မလား” ဆိုတဲ့ စိတ်လှုပ်ရှားမှုကို ပရိသတ်တွေဆီ ပေးဖို့ ခက်နေပါတယ်။ ဒါ့အပြင် ဆီလ်ဗက်စတာ စတားလုံး (Sylvester Stallone) ကိုယ်တိုင် မင်းသားအဖြစ် မပါတော့တာကလည်း ဒီဇာတ်ကားအတွက် နောက်ထပ် အခက်အခဲတစ်ခုပါပဲ။ ဒါကြောင့်လည်း ဇာတ်ကားနာမည်ကို ဂျွန် ရမ်ဘို (John Rambo) လို့ပဲ ပေးပြီး သူ့ရဲ့ လူမသိသေးတဲ့ အကြောင်းအရာတွေကို ပိုပြီး အသားပေးဖို့ ကြိုးစားနေတာ ဖြစ်နိုင်ပါတယ်။

ရမ်ဘိုဟာ ပိတ်ကားထက်မှာ နှစ်ပေါင်းများစွာ ရှိနေခဲ့ပေမဲ့ သူ့အကြောင်း ကျွန်တော်တို့ မသိသေးတာတွေ အများကြီး ရှိပါသေးတယ်။ အက်ရှင်ပိုင်းထက် သူ့ရဲ့ ဘဝဇာတ်ကြောင်းကို ပိုပြီး နက်နက်နဲနဲ ပုံဖော်ပြမယ်ဆိုရင် ပရိသတ်ကို ဆွဲဆောင်နိုင်မှာပါ။

မူရင်း ရမ်ဘိုကားတွေဟာ အက်ရှင်သက်သက်တင် မဟုတ်ဘဲ ခံစားချက်တွေကိုပါ ဦးစားပေးတာမို့လို့ အခု Prequel အတွက်လည်း အဆင်ပြေစေမှာပါ။ သူ အသက်ရှင်ကျန်ရစ်မှာ မှန်ပေမဲ့ စစ်ရဲ့ဒဏ်ရာဒဏ်ချက်တွေ၊ သူငယ်ချင်းတွေ ဆုံးရှုံးရတာတွေကိုပြပြီး ပရိသတ်ကို ရင်တလှပ်လှပ်ဖြစ်အောင် လုပ်လို့ရနေပါသေးတယ်။

ဒါကြောင့် ဒီဇာတ်ကားက ရင်ဆိုင်နေရတဲ့ ဇာတ်လမ်းပိုင်း အခက်အခဲတွေကို အကောင်းဆုံး ကျော်ဖြတ်နိုင်မယ်လို့ ယူဆရပါတယ်။

Source : https://screenrant.com/